As obras da estación intermodal de Lugo víronse interrompidas durante unha hora este xoves ao mediodía por unha acción simbólica protagonizada por delegados e delegadas da CIG-Construción e Madeira (FCM-CIG).
O sindicato quería denunciar con esta acción “a negativa da patronal a sentar a negociar un convenio autonómico para o sector da construción en Galicia, que permita establecer unhas condicións laborais dignas e frear a fuga continua de man de obra”.
A protesta, que forma parte dun calendario de mobilizacións que a central sindical leva meses desenvolvendo en todo o territorio galego, pretende visibilizar unha situación que consideran “insustentable”: a imposición de condicións desde o marco estatal que impide mellorar os convenios provinciais.
A CIG, sindicato maioritario do sector en Galicia, reclama abrir unha vía galega de negociación ao amparo do cambio lexislativo que outorga prioridade aos convenios autonómicos fronte aos estatais.
Antes de ocupar as obras, os representantes sindicais do catro provincias celebraron unha asemblea na sede local da CIG en Lugo, onde analizaron o estancamento da situación e acordaron endurecer as protestas.
O secretario nacional da FCM-CIG, Plácido Valencia, advertiu que se a patronal galega continúa sen atender ás súas demandas, o sindicato convocará unha folga xeral no sector tras o verán.
Durante a acción reivindicativa na intermodal detivéronse temporalmente os traballos nas dúas obras e realizouse unha asemblea aberta cos operarios presentes na obra, na que se explicou a necesidade dun marco galego de negociación e resolvéronse dúbidas en materia laboral.
A protesta concluíu de forma pacífica con presenza da policía local e nacional, e serviu para trasladar unha mensaxe clara á patronal: de non haber avances, o conflito irá a máis.
Valencia recalcou o dereito “a negociar aquí e non en Madrid nosas condicións laborais”, e subliñou que un convenio galego “evitaría o que pasou co convenio da construción de Pontevedra ou o de pintura da Coruña, impugnados pola patronal estatal por recoller melloras por encima do marco estatal”.
