O Concello de Santiago e o Ministerio de Vivenda avanzaron este xoves nun acordo clave para o futuro urbanístico do Ensanche, ao anunciar que a totalidade das vivendas proxectadas na parcela do antigo colexio ‘Peleteiro’ serán a prezo accesible. Así o confirmaron a alcaldesa, Goretti Sanmartín, e a ministra de Vivenda, Isabel Rodríguez, tras unha xuntanza celebrada no Pazo de Raxoi, na que tamén participaron a tenenta de alcaldesa María Rozas, o concelleiro de Urbanismo Iago Lestegás e a subdelegada do Goberno na Coruña, María Rivas.
Segundo trasladaron ambas responsables institucionais, a parcela pasará a estar integrada no parque público de vivenda unha vez que se complete o traspaso dos terreos desde a Sareb á nova Empresa Pública de Vivenda, proceso que se prevé entre finais de xuño e comezos de xullo. A ministra sinalou que o planeamento urbanístico aprobado xa recolle que o 45 % das vivendas serán protexidas, e adiantou que o 55 % restante tamén será destinado a vivenda accesible: “O 100 % das vivendas que imos promover serán accesibles e protexidas de por vida”.
Durante a comparecencia conxunta, a alcaldesa Goretti Sanmartín subliñou que esta decisión “é froito do compromiso do Ministerio coa cidade” e destacou o valor estratéxico da parcela de Peleteiro “no corazón do Ensanche compostelán”. A rexedora apuntou que “acceder a unha vivenda digna e a un prezo razoable é hoxe a principal preocupación da veciñanza”, e atribuíu a actual situación de carestía a “un modelo que tratou a vivenda como un negocio e non como un dereito básico”.
Sanmartín tamén cualificou a visita da ministra como unha “mostra de recoñecemento ao papel de vangarda que está a exercer o Concello nas políticas de vivenda” e agradeceu que Isabel Rodríguez se desprazase a Santiago para coñecer de primeira man as actuacións municipais nesta materia.
Pola súa banda, a ministra recoñeceu os “pasos importantes” dados polo goberno local coa modificación do planeamento e asegurou que ambas institucións “poñeranse a traballar de inmediato” para facer realidade a edificación e entrega das vivendas.
A visita institucional rematou coa asinatura da ministra no Libro de Honra do Concello, acompañada pola alcaldesa e representantes da corporación, nun acto simbólico no que Isabel Rodríguez manifestou o seu agradecemento por poder tratar “un tema tan importante como é a vivenda”.
Este novo impulso á promoción pública de vivenda chega nun momento en que o goberno local de Santiago está a reforzar as medidas para frear a escalada de prezos e ampliar a oferta en condicións dignas, especialmente no centro urbano. A parcela de Peleteiro, considerada un dos poucos solos dispoñibles con capacidade para nova construción no Ensanche, converterase así nun proxecto referencial dentro da estratexia de vivenda municipal.
