O presidente da Xunta, Alfonso Rueda, manifestou non comprender as recriminacións da alcaldesa de Santiago, Goretti Sanmartín, por investimentos do Goberno galego en Ferrol, xa que o titular do Executivo autonómico defende apoios económicos “moi potentes” á capital de Galicia.
Nunha carta aberta aos veciños de Compostela, a alcaldesa de Santiago, Goretti Sanmartín, reprochou á Xunta o seu “desprezo” pola capital galega e denunciou o uso “partidista” da Administración autonómica, despois de que este luns o Consello da Xunta acordase unha colaboración de 12 millóns de euros co Concello de Ferrol, e que chegará aos 185 millóns en diversas actuacións na comarca, para a rehabilitación de edificios e a reurbanización.
“A alcaldesa non debería molestarse por que invistamos noutros sitios, non creo que lle gustase que outras cidades fixesen críticas”, sentenciou a este respecto Alfonso Rueda. “Non sei por que lle molesta que fagamos investimentos noutras cidades, facémolas en Santiago”, dixo ao reivindicar o destino de partidas “moi potentes” nesta cidade, entre elas pola súa condición de capitalidade. “Supoño que non lle ía gustar que outros alcaldes e alcaldesas protestasen”. “Pido ‘sentidiño’, a Xunta ten que investir en todas partes”, recalcou para incidir en actuacións levadas a cabo na capital galega.
Tamén preguntado pola prensa sobre esta cuestión, en declaracións no Parlamento, o conselleiro de Facenda, Miguel Corgos, dixo que non ve que “haxa ningún fundamento nas afirmacións” da alcaldesa de Compostela. Corgos expón que a Xunta “apoia a todos os municipios na medida das súas capacidades e cando ten proxectos”. Remarca que Santiago, como capital de Galicia, “ten unha axuda recorrente todos os anos que supera dabondo os 2 millóns de euros” e que este ano se incrementou a “máis de 2,6 millóns”.
O PPDEG ACÚSAA DE SER UNHA “AFILIADA RADICAL DO BNG”
Pola súa banda, o líder do PP de Santiago, Borja Verea, acusou á alcaldesa compostelá, Goretti Sanmartín, de actuar como unha “afiliada radical do BNG” e reprochoulle que “nunca un goberno local de Santiago utilizou de forma tan partidista a institución municipal”. Nunha carta aberta á cidadanía compostelá, o popular asegurou que falar de “desprezo”, “falta de decoro” ou “esmola” para referirse a a Xunta, “non é actuar como unha alcaldesa de todos os santiagueses” e acusou a Sanmartín de “esnaquizar décadas de boa relación” entre a Administración autonómica e o Concello de Santiago.
“Santiago de Compostela é sinónimo de convivencia, universalidade e diálogo. Ser o máximo representante público dunha capital cultural, espiritual e de valores universais con proxección mundial como Santiago esixe máis que en ningunha outra administración gobernar para todos e esquecerse das cores políticas”, aseverou Verea na súa carta. Con todo, asegurou que o actual Goberno autonómico fixo o “maior incremento” ao Estatuto da Capitalidade dos últimos 15 anos; “un incremento do 10 %, cinco veces por encima do que crece o orzamento total” e denunciou que o goberno municipal do BNG pedía “cantidades imposibles que só buscaban o conflito”.
