En canto ás etapas do concurso, destacou a (é)Tapa 4/Camiño Primitivo, que foi a máis votada con 3024 votos e tamén a máis consumida, con 6486 tapas servidas. Seguírona a (é)Tapa 1/Camiño Fisterra-Muxía, con 2613 votos e 6018 tapas consumidas, e a (é)Tapa 6/Camiño do Norte, con 4229 tapas consumidas.
Durante o acto de clausura, ademais de entregar os premios ás mellores tapas, realizarase un sorteo especial entre as 12.915 persoas que participaron na votación popular ao longo do concurso, celebrado entre o 13 de febreiro e o 2 de marzo.
Os galardóns principais, dotados con 1000 euros e un agasallo extra de AGACAL, corresponderán ás categorías de Tapa Creativa, Tapa Tradicional e Tapa Doce. O premio á Mellor Tapa Sen Glute, dirixido a apoiar a inclusión gastronómica das persoas celíacas, contará cun diploma e un cheque de 200 euros para a compra de produtos aptos. Así mesmo, premiaranse as tapas que mellor mariden con viños de Ponte da Boga e cervexas de Estrella Galicia, con 500 euros en produto para as gañadoras.
O certame, promovido baixo a marca Compostela Gastronómica, contou co patrocinio principal de Hijos de Rivera e a colaboración de entidades como AGACAL, o Mercado de Abastos de Santiago, Cash Record, Cafés Dromedario, ACEGA, Utimaq, Obradoiro CAB e SD Compostela.
Toda a información sobre o evento e os detalles da gala final poden consultarse na páxina web oficial: santiagoetapas.gal.
