Santiago é, despois de Oleiros, o concello con maior base media de cotización mensual, ao alcanzar os 2.286,7 euros de media por persoa en setembro de 2024, segundo os datos que publica este venres o Instituto Galego de Estatística (IGE).
A continuación, de acordo con esta estatística, sitúanse A Coruña, con 2.236,6 euros por persoa, e Bergondo, con 2.199,6 euros por persoa. As sete grandes cidades e os seus concellos limítrofes concentran as maiores bases de cotización de Galicia. En particular, na conurbación que rodea as cidades da Coruña e Ferrol a base media mensual por persoa sitúase por encima dos 1.900 euros.
Oleiros é o municipio coa base de cotización máis elevada de Galicia en setembro de 2024. Os afiliados con residencia alí cotizan por unha base que alcanza os 2.448,7 euros de media. Tamén é elevada a base media en parte dos concellos que conforman as comarcas da Mariña Oriental, Central e Occidental (en Foz, Burela, Cervo, Xove e Viveiro), en Cee (Costa da Morte) e na comarca de Valdeorras, entre outros.
