Supermercados Gadis reafirma o seu compromiso coa infancia e a igualdade de oportunidades colaborando un ano máis con UNICEF a través do programa Regalo Azul, unha iniciativa destinada a apoiar a poboación infantil máis vulnerable en contextos de crise humanitaria. Esta colaboración, activa de forma continuada desde hai máis de 30 anos, tradúcese nunha doazón económica para proporcionar vacinas, alimentos e auga potable a nenos e nenas de todo o mundo.
Este ano, Gadis enviou a través de UNICEF un total de 12.075 vacinas contra a polio, a mesma cantidade de sobres de alimento terapéutico e máis de 2,11 millóns de pastillas potabilizadoras, alcanzando un total de 4.025 kits de supervivencia. Estes recursos destínanse a nenos e nenas afectados por conflitos bélicos, catástrofes naturais ou a seca, así como a aqueles que habitan en países en vías de desenvolvemento.
María Montalvo, presidenta de UNICEF Comité Galicia, destacou que “un total de 213 millóns de nenos e nenas en 146 países necesitarán axuda humanitaria ao longo de 2025”. Salientou ademais que a colaboración de Gadis a través do programa Regalo Azul “é fundamental para garantir unha resposta humanitaria oportuna e eficaz”.
UN COMPROMISO A LONGO PRAZO COA INFANCIA
Desde 1993, Gadis mantén esta colaboración anual con UNICEF, adaptando a súa contribución ás necesidades máis urxentes do momento. A iniciativa forma parte do programa de Responsabilidade Social Corporativa da empresa, aliñado cos Obxectivos de Desenvolvemento Sostible (ODS) do Pacto Mundial de Nacións Unidas.
Entre os ODS que esta acción contribúe a cumprir destacan a erradicación da pobreza, a fame cero, a auga limpa e saneamento e a redución das desigualdades.
