Para vivir só Compostela é necesario un salario superior aos 2.000 euros. Sen que o custo do alugueiro supere o 30% do salario, un dos criterios que esixen a maior parte das aseguradoras de inquilinos á hora de alugar, é necesario un salario neto mensual que pode duplicar ou triplicar o salario mínimo interprofesional e que supera en calquera caso o salario medio en España, aínda que varía en función do barrio ou zona.
Segundo os últimos datos de alugueiros publicados polo portal inmobiliario Idealista neste mes de outubro de 2024 e cos datos de salario necesario calculados por Xornal de Compostela, as diferenzas de prezo entre áreas da cidade son significativas. Así, para vivir no Casco Vello ou na zona do Campus, o salario mínimo neto recomendado sitúase en arredor de 2880 euros. Pola súa banda, o Ensanche require uns 2420 euros, mentres que en barrios como Conxo e Sar as cifras soben ata os 2700 e 2543 euros, respectivamente.
No caso de Fontiñas, o salario necesario é o máis elevado, con 3073 euros, mentres que a zona de San Lázaro resulta máis accesible, cun salario neto recomendado de 2333 euros.
