O Monte do Gozo acollerá este sábado 7 e domingo 8 de setembro o Torneo 3×3 de baloncesto, unha das novidades da cuarta edición do Festival Go! Go! Zo!, impulsado pola Federación Galega de Baloncesto co apoio da Xunta de Galicia. O evento, que se desenvolverá desde as 9:00 horas ambos días, reunirá a preto de 300 participantes e combinará deporte, música e actividades lúdicas para toda a familia.
Na presentación, o secretario xeral da Lingua, Valentín García, destacou que esta iniciativa conxuga “lingua, deporte, mocidade e tempo de lecer”, englobando actividades culturais no marco do programa CulturON e a iniciativa FalaRedes. García animou a todas as familias a achegarse ao Monte do Gozo durante a fin de semana para participar nas actividades programadas.
Ademais do torneo, o festival contará co Partido das Estrelas, un concurso de triplas e sesións DJ, así como animación para os máis pequenos, con inchables e concertos no Espazo FalaRedes. O sábado, ás 11:45 horas, o grupo Cantigaéverso ofrecerá un concerto, e o domingo será a quenda de María Faltri Picadiscos, ás 12:45 horas.
Toda a información sobre o festival está dispoñible en www.gogozo.gal, mentres que o regulamento e horarios do torneo poden consultarse en www.fegaba.com.
