A SD Compostela pechou o seu cadro de xogadores para a tempada 2024/25 coa incorporación de Carlos Cinta Sánchez, un dianteiro emeritense de 26 anos que chega para achegar potencia ofensiva e goles ao equipo. Cinta, procedente do Badaxoz, asinou por unha campaña e poñerase de inmediato ás ordes do adestrador Antón Permuy.
Carlos Cinta destaca por ser un dianteiro de área con gran capacidade para o remate, un auténtico cazagoles que se caracteriza por marcar na maioría das ocasións ao primeiro toque. O xogador emeritense, con experiencia na Primeira RFEF, completará o ataque do Compostela, achegando presenza e eficacia ofensiva.
Na súa última tempada co Badaxoz, tamén en Segunda RFEF, Cinta anotou 5 goles en 17 encontros, todos eles disputados na primeira volta. Trátase dun xogador que explotou tarde, pero que demostrou o seu potencial ao longo das últimas tempadas, especialmente desde o seu paso polo Mérida, onde xogou tanto no filial como no primeiro equipo en Segunda División B.
A súa traxectoria levouno a destacar no Don Álvaro, da Terceira Federación, onde sumou 16 goles en 29 partidos, o que lle valeu para regresar ao Mérida na tempada 22/23, xa en Primeira Federación, onde foi un dos máximos goleadores do equipo con 7 tantos en 33 encontros.
Agora, na súa primeira experiencia fóra de Estremadura, Carlos Cinta chega a Santiago de Compostela cargado de ilusión e coa ambición de demostrar a súa capacidade goleadora, esperando dar moitas alegrías á afección compostelanista.
