O concelleiro do Partido Popular de Santiago, José Ramón de la Fuente, manifestou hoxe a súa preocupación pola falta de criterios obxectivos na formalización dos convenios cos clubs deportivos da cidade. Segundo o edil da oposición, “é entendible que as entidades deportivas se pregunten cales son realmente os criterios avaliables obxectivamente para poder acceder á financiación municipal”.
De la Fuente destacou que, actualmente, os obxectos, condicións e partes intervinientes nos convenios repítense sistematicamente ano tras ano, o que leva a que “sería de sentido común que houbese uns criterios para formalizar este tipo de axudas”. O edil popular alertou que a ausencia dun baremo estandarizado podería xerar unha aparente xestión caprichosa e unha sospeita de arbitrariedade. “Mellorar a transparencia na formalización de convenios, con un proceso regrado, obxectivo, equitativo, universal e claro, que hoxe non existe, é unha reivindicación dos axentes deportivos da cidade que, cremos, chegou o momento de atender”, engadiu.
Para o PP de Santiago, é esencial que os clubs e entidades deportivas saiban que poden acceder a unha ferramenta xurídica proporcionada polo Concello, sempre que se cumpran os requisitos e se alcancen os logros establecidos obxectivamente. De la Fuente subliñou que isto axudaría a eliminar a percepción actual de que a relación de convenios formalizados polo Concello no ámbito deportivo está baseada máis na simpatía por un deporte ou entidade determinada que en criterios obxectivos.
O concelleiro popular propuxo a elaboración dunha regulamentación municipal que determine os criterios deportivos obxectivos para a formalización dos convenios, así como os importes económicos máximos vinculados a estes criterios, os compromisos que deberán adquirir as partes e as condicións baixo as que se formalizarán todos os convenios con clubs, asociacións, entidades e federacións deportivas operativas na cidade. De la Fuente instou ao BNG a “poñerse a traballar xa na procura desa normativa”.
