A SD Compostela conseguiu o pase á seguinte eliminatoria do play off de ascenso tras superar con claridade ao Vilalbésnun partido disputado no estadio Vero Boquete que rematou cun contundente 6-1. O equipo compostelán asinou unha actuación sólida en ataque e controlou o encontro practicamente desde o primeiro minuto ante a mellor entrada da tempada no estadio.
O partido comezou cun ritmo elevado e coa escuadra local buscando a portería rival desde os primeiros compases. Apenas transcorreran cinco minutos cando chegou o primeiro tanto. Unha combinación iniciada por Parapar permitiu a Valín servir un balón raso á área que Maceira transformou no 1-0, facendo estalar a bancada.
A vantaxe non modificou o guión do encontro. O Compostela continuou xerando perigo e ampliou distancias superado o cuarto de hora. Nunha rápida transición ofensiva, Samu conduciu a xogada e habilitou a Armental, que resolveu cun disparo colocado ao segundo pau para establecer o 2-0.
Os locais continuaron acumulando chegadas e dispuxeron de varias ocasións para ampliar a diferenza antes do descanso. Pablo Crespo tivo unha oportunidade clara e tamén houbo protestas por unha acción sobre Maceira dentro da área que o colexiado non sinalou. O terceiro acabou chegando xa no tramo final da primeira metade, nun saque de esquina lanzado por Parapar no que unha acción desafortunada da defensa visitante terminou co balón no fondo da portería para o 3-0.
Na reanudación, o Vilalbés mostrou unha maior presenza ofensiva e reduciu diferenzas aos cinco minutos cun gol de Anthony. Con todo, a reacción visitante durou pouco e o Compostela recuperou axiña o control.
Parapar converteuse nunha das figuras do encontro, liderando boa parte das accións ofensivas do equipo. O cuarto gol chegou tras unha nova xogada súa pola banda que rematou cun rexeitamento do gardameta aproveitado por Antón Guisande, que marcou a porta baleira para o 4-1.
Pouco despois chegaría o quinto. Antón Guisande volveu superar a defensa rival e serviu un balón para que Maceira asinase o seu segundo gol da tarde. Xa no tempo engadido, e despois de novas ocasións locais, Charly pechou a goleada co 6-1 definitivo tras outra acción individual de Parapar.
