O Monbus Obradoiro xa é equipo da ACB. O conxunto santiagués selou este venres en Sar o seu regreso á máxima categoría do baloncesto estatal tras derrotar con autoridade ao Gipuzkoa Basket por 85-68 nun partido que foi de menos a máis e que terminou convertido nunha auténtica festa colectiva en Compostela.
Nun Multiusos Fontes do Sar con máis de 6.000 espectadores, sen unha butaca libre e entregado dende o primeiro “Miudiño”, o equipo de Diego Epifanio soubo superar un inicio cheo de tensión para construír unha vitoria sólida, madurada desde a defensa, o control interior e unha segunda metade na que acabou por romper o encontro.
O duelo comezou con máis acerto visitante. O Gipuzkoa puxo en problemas aos composteláns nos primeiros minutos, chegando a dominar por 6-11 tras un parcial que obrigou a Epi a deter o partido. Mais a reacción local chegou desde o banco: Sergi Quintela revolucionou o ritmo, Andersson deu consistencia atrás e o Obradoiro conseguiu pechar o primeiro cuarto por diante (26-24), cun tapón de Kravic como símbolo do cambio de tendencia.
No segundo período, o cadro santiagués empezou a atopar vantaxe no xogo interior. Kravic, Dos Anjos e Ngom fixeron dano preto do aro, mentres Brito e Barcello achegaban puntos clave para abrir unha pequena fenda. O Gipuzkoa resistiu da man de Tate e McGhie, pero o Obra marchou ao descanso con vantaxe (47-42) e coa sensación de ter encontrado o camiño.
Tras o paso polos vestiarios chegou o momento decisivo. O terceiro cuarto permitiu aos composteláns consolidar o mando grazas ao control de Westermann, á inspiración ofensiva de Barcello e á aparición determinante de Quintela, autor de accións decisivas cando o rival tentaba achegarse. O 65-56 ao final do terceiro acto deixaba o ascenso a dez minutos.
No último cuarto, Sar empurrou e o Obradoiro respondeu. Quintela asumiu galóns, Brito asinou un mate que levantou o pavillón e un triplo de Westermann para o 79-63 acabou por derrubar a resistencia vasca. A partir de aí, cada defensa, cada rebote e cada canastra convertéronse nunha conta atrás cara ao regreso á elite.
Quintela, con 20 puntos, foi un dos grandes nomes da noite, acompañado pola fortaleza de Kravic, decisivo na pintura, e pola dirección de Westermann nun partido coral no que o equipo santiagués exhibiu profundidade e carácter competitivo.
Co bocinazo final, Sar estalou. A afección compostelá celebrou un ascenso que pecha dous anos de travesía na Primeira FEB e devolve ao Obradoiro ao lugar que perseguía desde o descenso: a ACB. Compostela recupera así o baloncesto de máximo nivel e faino nunha noite de comuñón total entre equipo e bancada.
