O Club Baloncesto Ames conquistou esta pasada fin de semana o campionato da 3ª División Sénior Masculina da zona de Santiago, un éxito que coincide coa celebración dos vinte anos de traxectoria da entidade e que sitúa ao equipo ás portas dun posible ascenso sen precedentes na súa historia.
O equipo dirixido por Daniel Fentes impúxose na final da fase eliminatoria ao ADB Fontiñas, anterior campión da categoría, tras vencer nos dous encontros da eliminatoria. O conxunto amesán logrou unha renda de 18 puntos tanto no partido de ida como no de volta, culminando así unha traxectoria ascendente nunha tempada na que foi consolidando o seu nivel competitivo co paso das xornadas.
Despois dunha fase regular na que o equipo evolucionou de menos a máis, o Club Baloncesto Ames mantivo a súa solidez nas eliminatorias, asinando resultados contundentes ata conquistar por primeira vez este título. A pesar da diferenza final no marcador, a final foi disputada e converteuse nunha cita destacada para o baloncesto da comarca, cunha serie intensa entre dous conxuntos que ofreceron un elevado nivel competitivo.
Este campionato supón un novo fito para a entidade amesá, que incorpora por vez primeira este logro ao seu palmarés e mantén intacta a posibilidade de completar a súa mellor campaña cun ascenso de categoría. De conseguilo, sería a primeira vez nos seus vinte anos de historia que o club accedese á 2ª División Sénior Masculina.
O seguinte desafío será a fase de ascenso galega, na que participarán campións e subcampións das oito delegacións territoriais da categoría. O sistema de competición establecerá catro grupos de catro equipos mediante sorteo, cun formato de liga a dobre volta. Só o primeiro clasificado de cada grupo logrará o ascenso directo.
