Santiago de Compostela puxo en marcha o programa de voluntariado dos XVI Xogos do Eixo Atlántico, unha iniciativa coa que o Concello busca incorporar máis de medio cento de persoas á organización dun dos principais eventos deportivos xuvenís do verán, que se celebrará na cidade entre o 5 e o 10 de xullo.
A concelleira de Deportes, Pilar Lueiro, presentou este martes o dispositivo acompañada por representantes da Universidade de Santiago de Compostela e do Departamento municipal de Deportes, destacando que a cita converterá a capital galega nun punto de encontro para máis de 2.300 deportistas procedentes de 28 cidades galegas e portuguesas. Segundo explicou, o desenvolvemento da competición require unha ampla estrutura de apoio na que o voluntariado terá un papel central.
O programa contempla dúas áreas principais de colaboración. Por unha banda, haberá persoas voluntarias asignadas de forma estable ás delegacións participantes, con dúas persoas de apoio para cada cidade co obxectivo de facilitar a súa estancia e coordinación. Por outra, habilitarase un equipo destinado ás instalacións deportivas, encargado de tarefas de asistencia a árbitros, apoio loxístico aos equipos, distribución de vestiarios, control de material e atención ao público.
Desde o goberno local fixeron un chamamento á participación da cidadanía maior de idade, subliñando que calquera persoa interesada pode informarse e inscribirse a través da Concellería de Deportes, con sede no Estadio Verónica Boquete de San Lázaro, por teléfono ou mediante correo electrónico.
Pola súa parte, o coordinador do Servizo de Participación e Inclusión Universitaria da USC, Javier Agrafojo, salientou a dimensión educativa e social do proxecto e lembrou que a universidade conta cun rexistro de voluntariado aberto non só ao alumnado, senón tamén á cidadanía en xeral. A través desta colaboración, as persoas inscritas contarán con cobertura de seguro de responsabilidade civil e accidentes, ademais dunha certificación oficial pola súa participación.
No caso do estudantado universitario, a colaboración poderá traducirse tamén en recoñecemento académico mediante créditos ECTS, en función das horas de participación e dunha formación complementaria específica. Agrafojo explicou que con 15 horas de colaboración e unha parte académica previa xa se poderá acceder ao primeiro crédito.
Desde a organización deportiva, o técnico Fran Sanín incidiu na relevancia do evento para a proxección de Santiago como referencia deportiva no noroeste peninsular e animou á participación cidadá para reforzar unha estrutura que será clave no funcionamento diario das probas.
Os XVI Xogos do Eixo Atlántico reunirán durante unha semana en Compostela centos de competicións e actividades deportivas, nun encontro que combina dimensión competitiva, intercambio cultural e cooperación entre territorios de Galicia e Portugal. O programa de voluntariado preséntase así como unha das pezas organizativas esenciais para soste-lo desenvolvemento dunha cita internacional de grande dimensión.
