O Concello de Santiago presentou unha nova edición do Duatlón Cidade de Santiago, que celebrará a súa 26ª convocatoria este sábado 25 de abril cun programa que se desenvolverá durante toda a xornada e que reunirá arredor de 600 participantes entre escolares e adultos.
A concelleira de Deportes, Pilar Lueiro, destacou que a cidade volverá converterse na “capital do deporte” cunha disciplina que combina atletismo e ciclismo e que, segundo sinalou, promove tanto o desenvolvemento físico como o mental. A edil subliñou tamén o carácter “inclusivo e popular” da cita, que contará con probas adaptadas e abertas á participación de persoas de distintos niveis.
A programación comezará ás 09:30, cunha primeira parte centrada no deporte base, onde competirán as categorías benxamín, alevín, infantil e cadete nas finais provinciais da Coruña. A entrega de trofeos destas probas terá lugar ás 12:30. Pola tarde, desde as 14:00, será a quenda das categorías xuvenil e júnior, antes de dar paso á proba popular aberta á cidadanía.
A xornada culminará coa celebración do Campionato Galego de Dúatlon de Estrada, que incluirá categorías masculina, feminina e inclusiva. A entrega final de premios está prevista para as 20:30.
Segundo explicou o representante da organización, Ignacio Varela, esta edición supón “un reto” pola coincidencia das finais escolares e do campionato autonómico, aínda que tamén unha “ilusión” para o equipo organizador. Varela destacou a diversidade de idades e perfís participantes, desde nenos de 5 ou 6 anos ata persoas maiores de 60, e sinalou que o obxectivo é consolidar a proba nos vindeiros anos.
Dende o Concello, Pilar Lueiro incidiu na aposta municipal por “fomentar hábitos de vida saudables, a convivencia e a dinamización da cidade” a través de eventos deportivos, ao tempo que agradeceu o traballo do Club Triatlón Santiagoe das entidades colaboradoras.
No apartado organizativo, a concelleira fixo un chamamento á colaboración cidadá para garantir a seguridade, especialmente no ámbito do Monte do Gozo, onde se desenvolverá parte da competición. Recoméndase acceder pola contorna do hotel de San Lázaro ou pola zona de San Marcos, evitando a rúa das Estrelas, que permanecerá cortada durante o evento.
A presentación serviu tamén para anunciar melloras en infraestruturas deportivas da cidade, como a posta en funcionamento do pavillón do CEIP Lamas de Abade e a renovación do campo de fútbol de Belvís, que incorpora un sistema de céspede sen recheo.
A organización anima á cidadanía a achegarse á proba para participar ou asistir como público nunha fin de semana na que Santiago acollerá diversas actividades deportivas.
