A SD Compostela non puido sumar unha nova vitoria no seu desprazamento a Vilalba, onde un penalti no tempo engadido fixo que o encontro rematase cun 2-2. O resultado permite ao equipo seguir líder da clasificación e manter a súa condición de invicto, aínda que deixou a sensación de ter perdido dous puntos no último intre.
O encontro comezou de cara para o cadro compostelán. Aos dez minutos, Maceira, máximo goleador do equipo, abriu o marcador cun disparo raso e axustado tras superar ao porteiro local nun man a man. O Villalbés respondeu antes da media hora cun tanto do excompostelanista Make, que puxo o empate co que se chegou ao descanso.
Na segunda metade, o Compos volveu poñerse por diante no minuto 63, cando un centro de Diego Rodríguez acabou en autogol de Jose Varela, que tentou evitar o remate dun dianteiro visitante. Os santiagueses dispuxeron de varias ocasións claras para sentenciar, incluído un remate de cabeza de Maceira, pero a falta de acerto mantivo con vida ao conxunto local.
Cando o partido xa tocaba ao seu fin, Borja Míguez caeu na área e o árbitro sinalou o punto de penalti. Pablo Trigo executou a pena máxima e bateu a Álex Cobo, establecendo o definitivo 2-2.
Con este empate, o Compostela suma 22 puntos e conserva o primeiro posto da táboa. A próxima cita será no Vero Boquete, onde os de Fabiano recibirán ao Noia.
