A SD Compostela continúa a súa boa traxectoria no Vero Boquete de San Lázaro. O conxunto branquiazul sumou este domingo unha nova vitoria, por 3-2 ante o Lugo B, e mantén o liderado do Grupo 1 da Terceira RFEF tras sete xornadas disputadas.
O partido, seguido por 1.110 afeccionados, comezou coa habitual intensidade dun duelo entre dous equipos que procuran xogar con verticalidade. O Compos foi medrando co paso dos minutos e conseguiu abrir o marcador no minuto 37 cun cabezazo de Adrián Armental, que aproveitou un centro preciso de Diego Rodríguez para adiantar aos locais.
Xa no desconto da primeira metade, Maceira ampliou a vantaxe cunha acción de forza e definición dentro da área, establecendo o 2-0 co que se chegou ao descanso.
Na segunda parte, os composteláns non baixaron o ritmo e, no minuto 65, Parapar transformou un penalti cometido sobre Goris, logrando o terceiro tanto e o que semellaba sentenciar o encontro. Porén, o filial lucense non se deu por vencido e Samu recurtou distancias pouco despois. Xa no tramo final, Ibe, tamén desde os once metros, fixo o 3-2 que puxo emoción aos últimos minutos.
O Compos soubo resistir e asegurar tres puntos fundamentais para seguir á fronte da clasificación. A vitoria, celebrada con alivio polos seareiros, serve para consolidar a dinámica positiva dun equipo que suma xa varios encontros consecutivos sen perder.
A próxima fin de semana, os de Rodri Veiga afrontarán un novo desafío coa visita ao Alondras, co obxectivo de prolongar a boa racha e manterse no máis alto da táboa.
