O Monbus Obradoiro confirmou o regreso do pívot serbio Dejan Kravic (2,13 metros) para reforzar o xogo interior do equipo tras a grave lesión sufrida por Goran Huskic na primeira xornada ligueira ante o Hestia Menorca. Kravic, que xa vestiu a camiseta obradoirista na tempada 2019/20, volverá así a Santiago de Compostela para apuntalar a pintura do conxunto galego.
O xogador incorporarse aos adestramentos a finais desta semana, co obxectivo de poñerse ás ordes de Diego Epifanio ‘Epi’ o antes posible e estar dispoñible nos próximos compromisos. Compartirá rotación con Felipe dos Anjos e Aitor Etxeguren, achegando experiencia, presenza física e coñecemento do xogo.
Na última campaña, Kravic militou no Movistar Estudiantes, equipo co que disputou 34 partidos de liga regular na Primeira FEB, asinando unha media de 11,9 puntos, 6,6 rebotes e 0,8 asistencias. A súa achega resultou clave para que o conxunto madrileño alcanzase a Final Four de ascenso á Liga Endesa.
O pívot conta cunha ampla traxectoria no baloncesto español, tras o seu paso por San Pablo Burgos, Unicaja Málaga e Casademont Zaragoza, ademais da súa anterior etapa en Santiago.
Para o adestrador do Obradoiro, Diego Epifanio, trátase dun xogador “con ampla experiencia internacional, que ademais coñece ben a categoría tras disputala a pasada tempada”. Segundo explicou, destaca pola súa “excelente lectura do xogo, a capacidade para xerar vantaxes nas continuacións de bloqueo e a eficacia no rebote en ambos aros”.
Epi engadiu que “nos axudará a equilibrar o xogo interior e a contar con máis recursos na rotación”, e valorou especialmente que “a súa adaptación poida ser rápida, xa que coñece a cidade, o club e a varias das persoas que continúan desde a súa anterior etapa”.
