A tradicional Carreira Pedestre de Santiago celebrará este ano a súa 46ª edición o domingo 26 de outubro, con saída desde a avenida de Xoán XXIII ás 10:00 e chegada na praza do Obradoiro, punto final dun percorrido que cada ano reúne milleiros de participantes e afeccionados.
A presentación da proba tivo lugar este martes no Hotel Monumento San Francisco, nun acto no que participou a concelleira de Deportes, Pilar Lueiro, acompañada de representantes das entidades organizadoras e colaboradoras.
Durante a súa intervención, Lueiro subliñou que o deporte “en todas as súas formas e disciplinas, constrúe, competición a competición, evento a evento, carreira a carreira, boa parte da Compostela que somos: inclusiva, igualitaria, participativa, competitiva, dinámica, inspiradora e orgullosa de si mesma”.
A edil compostelá salientou ademais que a carreira é “un motivo de orgullo colectivo e de celebración compartida”, convidando á cidadanía a encher as rúas da cidade o domingo 26, xa sexa “correndo ou de calquera outro xeito de implicación”.
A Carreira Pedestre compostelá, organizada polo Concello de Santiago en colaboración con diferentes entidades deportivas e patrocinadores, é un dos eventos máis emblemáticos do calendario deportivo galego, consolidado como unha cita de referencia tanto para atletas profesionais como para corredores afeccionados.
