A SD Compostela continúa firme na cabeza da Terceira RFEF. O conxunto compostelán sumou un novo punto este domingo tras empatar 1-1 en Barreiro fronte ao Gran Peña, filial do Celta de Vigo, nun encontro moi disputado no que os de Fabiano Soares souberon manter a condición de invictos tras seis xornadas.
O partido comezou con boas sensacións para o Compos, que se adiantou na primeira metade grazas a un penalti cometido sobre Maceira. Parapar, encargado da execución, non fallou desde os once metros e asinou o seu primeiro gol tras o regreso ao club, poñendo o 0-1 no marcador.
Na segunda parte, o Gran Peña intensificou o seu dominio e logrou o empate por medio de Julius, que aproveitou un balón solto na área para bater a Álex Cobo. O porteiro compostelán sería despois protagonista ao detér un segundo penalti, lanzado por Cellerino, evitando así a remontada dos vigueses cunha intervención decisiva.
Co empate final, o Compostela suma 14 puntos de 18 posibles e mantense na primeira posición do Grupo 1, á espera de recibir a próxima fin de semana ao Lugo B no Vero Boquete de San Lázaro, onde buscará reencontrarse coa vitoria e seguir marcando o ritmo da competición.
