A praza do Obradoiro acolleu esta mañá a saída das XIII Marchas Ciclistas Unificadas de Special Olympics Galicia, unha actividade que conxuga deporte, inclusión e solidariedade e que se consolida como unha das citas destacadas do calendario galego de eventos sociais.
O subdelegado do Goberno na Coruña, Julio Abalde, participou no acto de inicio e subliñou que “a sociedade é máis xusta cando todas as persoas poden participar en igualdade de condicións”, reafirmando o compromiso do Goberno de España coa inclusión e co apoio a entidades como Special Olympics Galicia, que traballan cada día pola integración real das persoas con discapacidade intelectual.
As marchas teñen como obxectivo promover a convivencia, a igualdade e a integración a través do deporte, e contan coa colaboración de deportistas, familiares, voluntariado e representantes institucionais. Nesta edición, arredor de sesenta participantes completaron un percorrido polas rúas compostelás cunha saída e chegada no Obradoiro, convertendo o corazón da cidade nun espazo de encontro e visibilidade para a diversidade.
