O Monbus Obradoiro inaugura este xoves a súa nova tenda oficial, situada no Multiusos Fontes do Sar. O local abrirá inicialmente de luns a venres en horario de 11:00 a 14:00 e de 17:00 a 20:00, ata o venres 3 de outubro, data a partir da cal se anunciará o horario definitivo para o resto da tempada.
Segundo explicou o club, este será de momento o único punto de venda presencial autorizado para adquirir roupa e artigos de mercadotecnia oficiais do Obradoiro. A iniciativa complétase coa venda en liña, co obxectivo de “reforzar a presenza da marca” e facilitar que a afección poida acceder aos produtos do equipo tanto de forma presencial como a través da web.
O novo espazo non só estará dedicado á venda, senón que funcionará tamén como punto de encontro para a afección, onde será posible realizar consultas ou recoller os abonos físicos da tempada.
O club avanzou que, nas vindeiras semanas, se irán incorporando máis artigos á oferta dispoñible, tanto na tenda física como na plataforma en liña, coa intención de que cada seareiro “poida sentirse identificado cos cores e valores do Obradoiro”.
