Conxo converteuse este domingo no punto de partida da edición 2025 do circuito CorreSan, que combina deporte e vida nos barrios de Compostela. A cita congregou a 773 atletas inscritos, segundo anunciou a organización ao comezo da proba, e decorreu cunha alta participación veciñal e ambiente festivo, coincidindo co centenario da anexión do antigo concello de Conxo a Santiago.
A carreira, que celebra a súa segunda edición neste barrio, abriu un calendario que incluirá outras catro probas ata novembro. A concelleira de Deportes de Santiago, Pilar Lueiro, expresou a súa satisfacción polo desenvolvemento da xornada e destacou a consolidación da cita: “Isto vai medrando ano a ano e a verdade é que é un gustazo”. Tamén agradeceu o labor das persoas implicadas na organización, sinalando que “aquí hai moita xente traballando detrás” para facer posible este evento deportivo.
A presidenta da Asociación de Veciños Conxo Aberto, Eva Armental, salientou o significado especial desta edición da CorreSan: “Conxo cumpre 100 anos sen concello. Santiago gañou moito, pero Conxo tamén gañou moito”. A representante veciñal defendeu a inclusión do deporte dentro das actividades conmemorativas do centenario, asegurando que “dá gusto ver a praza chea de deportistas” e que “o deporte ten fundamento e con moito cariño acolléndoo”.
A proba de Conxo é a primeira das cinco que compoñen o Circuito CorreSan 2025, unha iniciativa municipal que pretende fomentar o exercicio físico entre a cidadanía e achegar o atletismo popular aos distintos barrios da cidade. As próximas citas terán lugar no Casco Histórico (12 de xullo), na Ruta dos Parques (14 de setembro), en San Pedro (11 de outubro) e finalmente en Angrois, na Ruta da Prata (15 de novembro).
