O ADB Fontiñas entregou esta semana os 400 pares de calzado recollidos na campaña solidaria ‘Ti podes deixar a túa pegada‘, destinados aos arredor de 340 mozos refuxiados recentemente chegados a Santiago de Compostela, a maioría procedentes de Mali e Senegal. O calzado doado, principalmente zapatillas deportivas e de inverno, será distribuído pola ONG RESCATE entre os refuxiados aloxados nas instalacións da Silvouta e Monte do Gozo.
A campaña contou coa colaboración de diversas entidades do barrio, como Alcampo Área Central, a Facultade de Ciencias Económicas e Empresariais da USC e o IES Rosalía de Castro, entre outros. Tamén se incorporou un lote de calzado chegado dende Alemaña, doado por un antigo socio do club que cursou parte dos seus estudos en Santiago.
A iniciativa xurdiu ao detectar a falta de equipamento deportivo nos encontros organizados polo ADB Fontiñas, que incluíron adestramentos abertos e un torneo de baloncesto 3×3. Estes eventos, organizados para promover a inclusión social mediante o deporte, expuxeron a necesidade de calzado axeitado para que os mozos poidan participar na actividade deportiva.
O club anticipou que continuará con esta acción solidaria, organizando novos adestramentos inclusivos e pequenas competicións co obxectivo de facilitar o contacto dos refuxiados coa cidadanía local e fomentar a súa integración social.
Fundado no barrio das Fontiñas, o ADB Fontiñas leva case vinte anos promovendo o baloncesto como ferramenta de crecemento social e integración.
