A SD Compostela incorpora ao seu plantel para a tempada 2024/25 ao mediocentro Ransford Selasi, un xogador ganés con experiencia en diversas ligas europeas. O futbolista, de 28 anos, firma co club compostelán ata final de tempada tras quedar libre despois da súa última campaña na UD Melilla.
Selasi é un xogador destacado polo seu poderío físico e a súa capacidade para cubrir moito terreo no centro do campo. Ao longo da súa carreira, pasou polo fútbol italiano, suízo e español, o que lle permite aportar unha bagaxe internacional de alto nivel.
O seu percorrido futbolístico comezou nas categorías inferiores do Pescara en Italia, co que logrou un ascenso histórico a Serie A. Posteriormente, xogou en equipos como o Novara, Fano e a Juventus Next Gen, sumando un total de 56 encontros en Serie B e 41 en Serie C. Tamén tivo un paso por Suíza, onde xogou na Superliga co Lugano e na segunda categoría co Kriens.
Recentemente, en España, Selasi competiu coa AD Ceuta e o Estepona antes de pasar pola UD Melilla, onde se consolidou como unha peza importante no centro do campo. Agora, chega a Compostela coa intención de seguir demostrando o seu nivel e contribuír aos éxitos do equipo.
O xogador xa se incorporou aos adestramentos e está á disposición do corpo técnico para o próximo partido desta semana.
