O venres 4 de outubro, ás 19:00 horas, a sexta edición do Festival Ateneo Barroco dará comezo ao seu novo Club de Lectura na sede do Ateneo de Santiago, situada na Praza de Salvador Parga, 4. A primeira obra elixida é El Amor el mar de Pascal Quignard (Galaxia Gutenberg, 2023), unha novela inspirada no compositor barroco Johann Jakob Froberger. A sesión será moderada polo filólogo e editor Carlos Valdés. A inscrición é gratuíta pero con prazas limitadas, polo que é necesario rexistrarse previamente enviando un correo a ateneo@ateneodesantiago.gal.
Dentro da mesma programación, o sábado 5 de outubro, ás 20:00 horas, terá lugar o concerto ‘La Défense de Le Blanc’ na Igrexa da Universidade. O ensemble Concert Le Phénix, dirixido por Fernando Santiago, interpretará un programa dedicado á defensa da viola da gamba fronte ao violonchelo no século XVIII, segundo o tratado de Hubert Le Blanc. O repertorio incluirá obras de compositores como Joseph Bodin de Boismortier e Michel Corrette, ofrecendo unha visión musical dunha época clave na evolución dos instrumentos de corda.
O Festival Ateneo Barroco pecha así a súa primeira semana de actividades con catro concertos máis e numerosas propostas complementarias que continuarán nos próximos días.
