A escola de música A Casa do Rock pechará o Festival Go!Go!Zo! cunha macroactuación no Monte do Gozo, o próximo domingo 22 de setembro, na que participarán máis de 500 amantes do rock de Galicia. A iniciativa, apoiada pola Xunta de Galicia, foi presentada hoxe polo secretario xeral da Lingua, Valentín García, acompañado polo organizador do festival, Julio Asorey, e un dos fundadores da Casa do Rock, Adrián Hernández.
Durante o acto, Valentín García destacou a importancia do evento para promover o uso da lingua galega a través do rock, así como o papel das escolas de música que incorporan o galego nos seus proxectos creativos. “Este tipo de iniciativas contribúen a crear canteira e a dar visibilidade ás novas promesas da música en Galicia”, explicou García, quen tamén agradeceu o traballo de Go! Go! Zo! e da Casa do Rock por apoiar as bandas noveis e achegalas ao público.
Inscrición aberta para participar
O festival comezará ás 16:00 horas e calquera persoa poderá unirse á macroactuación, xa sexa coa súa voz ou cun instrumento. Para participar, é necesario inscribirse no sitio web oficial da escola e descargar as partituras das versións en galego de temas clásicos do rock como Born To Be Wild de Steppenwolf ou Believer de Imagine Dragons.
Ademais do macroconcerto, o evento incluirá actuacións de sete grupos noveis galegos que presentarán as súas creacións e talento, entre eles Rocke Experience, The Ages e Hombres Hell.
