O conselleiro de Cultura, Lingua e Xuventude, José López Campos, visitou esta mañá a exposición “O legado Ángel. Arte e oficio en Compostela”, que se pode ver no Colexio de Fonseca ata finais de mes. A mostra, organizada coa colaboración da Xunta de Galicia, recompila por primeira vez unha selección de pezas da histórica Xoiería Ángel, con talleres en Santiago, Ourense e Vigo, creadas entre os anos trinta e 2003.
Durante o percorrido, o conselleiro destacou que esta exposición é “unha oportunidade para descubrir pezas de gran valor froito do traballo artesán”, poñendo en valor o oficio da xoiería e a súa importancia cultural. As obras, realizadas en ouro, prata, esmalte e marfil, están maioritariamente ligadas ao ámbito litúrxico, e moitas delas non eran accesibles ao público ata agora.
A mostra tamén inclúe unha sección dedicada ao legado da familia rexente da Xoiería Ángel, que durante tres xeracións conservou unha valiosa colección de obxectos arqueolóxicos, decorativos e artísticos vinculados á cidade de Santiago. Neste sentido, López Campos resaltou a importancia de “transmitir de xeración en xeración a paixón pola conservación de obxectos cargados de simbolismo”.
A exposición, instalada no Salón Artesoado de Fonseca, pode visitarse ata o final de setembro, ofrecendo ao público a oportunidade de coñecer un conxunto de ourivería e patrimonio de gran relevancia cultural.
