A Rúa de Abaixo, actualmente coñecida como Rúa do Espírito Santo, situada no barrio de Basquiños, prepárase para acoller as súas tradicionais festas esta fin de semana. O programa, organizado pola Asociación Veciñal ‘As Marías’, inclúe unha ampla variedade de actividades que buscan satisfacer a veciñanza de todas as idades, con eventos que se prolongarán desde o mércores 4 ata o domingo 8 de setembro.
A celebración deste ano xira en torno á temática do universo, e comeza o mércores coa elaboración dun mural colectivo, actividade aberta a maiores de 10 anos que terá lugar ás 18:00 horas na fonte da Rúa de Abaixo. Pola noite, a partir das 21:30, a Comisión de Cultura Científica da Gentalha do Pichel dirixirá unha sesión de astronomía pensada para toda a familia.
O xoves 5 estará dedicado aos máis pequenos, con actividades que inclúen un obradoiro de cabezudos infantís ás 18:00 horas, seguido dunha sesión de cinema infantil ás 21:00, ambos eventos na praza da Rúa de Abaixo.
O venres 8 chega un dos días máis esperados, coa celebración da noite de música tradicional. A partir das 22:00, os asistentes poderán disfrutar das actuacións de Pataghulhos, Bouba e Os Carunchos, que animarán a noite con música tradicional galega.
O sábado 7 será unha xornada repleta de actividades, que comezará coas alboradas a cargo de Devagarinho e As Ousadas de Sam Pedro. Ás 12:00, dará comezo unha volta ciclista ao barrio, con saída desde a Pastoriza. A continuación, celebrarase a tradicional sesión vermú tras o pregón de Xosé Manuel Penas Patiño, un veciño vinculado ao barrio e recoñecido naturalista.
A tarde do sábado contará con diversas propostas, como un bingo musical ás 17:00 horas, inchables para os máis cativos e o concerto infantil de Cé Orquesta Pantasma ás 19:30. A festa nocturna incluirá concertos desde as 22:00 e o tradicional concurso do ‘Baile do faroliño’.
As festas rematarán o domingo 8 coa actuación da Banda de Música Recreativa e Cultura da Bandeira, que ofrecerá un concerto ás 13:00 na fonte da Rúa de Abaixo.
Estas festas, organizadas por e para a veciñanza, son unha cita ineludible no calendario do Barrio das Marías, consolidándose ano tras ano como un evento destacado en Santiago de Compostela.
