Os Espazos +60 de Afundación, a Obra Social de ABANCA, reinician a súa actividade en Santiago de Compostela tras o parón estival, abrindo o prazo de inscrición para o curso 2024-2025. Desde hoxe e ata o próximo 20 de setembro, as persoas interesadas poderán matricularse nas distintas propostas que buscan promover o benestar das persoas maiores a través de programas formativos e de interacción social.
Entre as novidades deste curso destacan actividades dirixidas ao benestar emocional, como o programa ‘Coñecendo as emocións‘, que ofrecerá doce sesións para mellorar a xestión emocional na vida cotiá. Outra das novidades é o obradoiro ‘O camiño do dó‘, que axudará aos participantes a xestionar as perdas e reflexionar sobre as súas experiencias persoais.
A nivel tecnolóxico, o Espazo +60 de Santiago pon á disposición dos socios un servizo de acompañamento dixital personalizado, que inclúe apoio no uso de dispositivos móbiles e tabletas, así como obradoiros específicos sobre ferramentas dixitais, como Google Maps ou a xestión de contas a través de ABANCA móbil.
Para fomentar as relacións sociais e o exercicio físico, organízanse actividades como “Sae a pasear e conversar”, un grupo semanal de paseos para disfrutar do aire libre en boa compaña. Ademais, ofrécense cursos de expresión artística e musical, como o obradoiro de canto tradicional e pandeiretas, e clases de acordeón e pintura.
As actividades están abertas a todas as persoas socias do centro, e poderán desenvolverse tanto de maneira presencial como a través de plataformas en liña. Desde Afundación destacan que “os grupos de actividades poranse en marcha sempre que exista un número mínimo de inscricións”. Para formalizar a inscrición ou obter máis información, é posible contactar co Espazo +60 de Santiago a través de teléfono ou WhatsApp, ou visitando as súas instalacións.
Pódense consultar as actividades dispoñibles no Espazo +60 de Santiago na seguinte ligazón: Actividades_E_60_Santiago
