O ciclo de concertos Atardecer no Gaiás, promovido pola Xunta de Galicia a través da Fundación Cidade da Cultura, despedirase esta semana co pop como protagonista. O galego Santi Araújo e a madrileña Rocío Saiz serán os encargados de poñer o broche final a unha edición marcada pola diversidade de estilos e a combinación de artistas novos e veteranos.
O xoves 29 de agosto, o cantante e compositor de Ponteareas, Santi Araújo, subirá ao escenario da Praza Central do Gaiás para presentar o seu segundo traballo en solitario, Canciones para bailar. Este disco alegre e versátil mestura bossanova, folk e psicodelia sen perder a esencia do pop que caracteriza ao artista. Ademais, o álbum introduce elementos experimentais, como os sampler, que permiten gozar do saxofón de Emilio José e da batería de Jaime Mateo, membro falecido de Os Amigos dos Músicos.
Pola súa banda, o venres 30 de agosto, Rocío Saiz traerá o seu electropop ao Gaiás, pechando así a súa xira de presentación do álbum Autoboicot y descanso. Este concerto será unha das últimas oportunidades para ver á actriz, cantante e activista na súa faceta musical durante un tempo. O álbum de Saiz é unha viaxe emocional que recolle influencias dos anos 80 e de artistas como Robyn, Meat Loaf, Belinda Carlisle e Ludovico Einaudi.
Máis de 5.000 persoas desfrutaron xa dos concertos desta décimo cuarta edición de Atardecer no Gaiás, que incluíu dezaseis actuacións durante os xoves e venres de xullo e agosto. O ciclo destacou pola promoción de novos talentos, con especial atención ao panorama musical galego, contando con sete artistas do país no seu cartel: De Ninghures, Flow do toxo, A Pedreira, Amoebo, Alana, ALARIDO e o propio Santi Araújo.
Atardecer no Gaiás forma parte das actividades da campaña CulturON, coa que a Consellería de Cultura, Lingua e Xuventude programa máis de 30 actividades culturais diarias por toda Galicia, contando tamén co apoio de Cervezas Alhambra.
