O ciclo de espectáculos do Verán en Familia da Cidade da Cultura chega ao seu ecuador este mércores con ‘Viva o Pop!’, un concerto especial no que pequenos e maiores bailarán ao ritmo dos grandes éxitos dos 80 e 90. Máis de 1.200 persoas asistiron xa ás actuacións musicais e de circo programadas neste ciclo, impulsado pola Xunta de Galicia dentro da campaña de actividades de verán para todos os públicos, ‘CulturON’.
‘Viva o Pop!’ é un concerto a través do que rememorar a música que marcou a adolescencia de pais e nais cos máis pequenos da casa. Unha proposta de lecer da compañía Rock en Familia na que persoas de todas as idades poden vivir a experiencia da música en directo, á vez que descobren a historia das cancións dalgúns dos artistas e grupos máis relevantes da música pop contemporánea. A actuación será na Praza central da Cidade da Cultura ás 19.00 horas con entrada libre e gratuíta. O ‘Verán en Familia’ do Gaiás péchase o mércores 31 de xullo con ‘De Vilatriste a Vilalegre’, unha proposta de teatro de monicreques da Utópica Rodante.
