O ciclo Atardecer no Gaiás encara os seus últimos concertos do mes de xullo coa actuación de Bala, unha das bandas galegas con maior proxección internacional dentro da escena rock. O dúo formado por Ánxela Baltar e Violeta Mosquera subirá este xoves 23 de xullo ao escenario da praza central da Cidade da Cultura de Galicia, en Santiago de Compostela.
O concerto comezará ás 21:00 e terá acceso libre e gratuíto. A cita forma parte do programa impulsado pola Xunta de Galicia para achegar diferentes estilos musicais ao público durante as tardes e noites do verán no monte Gaiás.
Bala chegará a Compostela despois de actuar en escenarios e festivais de distintos puntos de España e de países como Reino Unido, Australia, Estados Unidos e Xapón. A banda coruñesa conta con catro traballos discográficos e cunha proposta construída arredor da guitarra, a batería e as voces das súas dúas integrantes.
No concerto do Gaiás, Baltar e Mosquera repasarán parte do seu repertorio, caracterizado pola combinación de rock, stoner, hardcore e punk. O proxecto incorpora referencias ao son máis intenso da década de 1990 e baséase no contraste entre as voces das dúas músicas.
O seu último disco, Besta, publicado en 2024 por PIAS, inclúe colaboracións con artistas e formacións como Tanxugueiras, Ana Curra, integrante de grupos como Alaska y los Pegamoides e Parálisis Permanente, e a banda estadounidense de punk Surfbort.
A programación de xullo continuará o xoves 30 coa actuación de Sheila Patricia, unha das voces da nova canción de autora galega. A súa proposta parte da tradición e incorpora unha perspectiva feminista, combinando composicións acústicas e íntimas con recursos electrónicos e novas texturas sonoras.
O venres 31 será a quenda de Lisdexia, grupo procedente de Muros que mestura garage, punk, pop, funk e elementos da música tradicional. A formación recolle parte da influencia do punk rock desenvolvido no municipio por bandas como Terbutalina, ao tempo que se incorpora a unha escena local da que tamén saíron nos últimos anos proxectos como The Rapants ou 9Louro.
CATRO CONCERTOS DURANTE O MES DE AGOSTO
O ciclo continuará en agosto con outras catro actuacións gratuítas. A primeira estará protagonizada polo grupo compostelán Dogo, que actuará o xoves 6 na Cidade da Cultura.
A semana seguinte concentrará tres citas consecutivas. O mércores 12, os lucenses Galician Army ofrecerán un set de música electrónica preparado para coincidir coa celebración do eclipse total de sol.
O xoves 13 terá lugar a segunda edición do Atardecer Fest, unha xornada dedicada ao rap e ás músicas urbanas que contará coas actuacións de Israel B, Santa Salut e Silee.
A décimo sexta edición de Atardecer no Gaiás pecharase o venres 14 de agosto co electropop de Turista Sueca, trío procedente de Barcelona.
O programa conta un ano máis co apoio de Cervezas Alhambra e forma parte da campaña de verán ‘Para gustos, cultura’, promovida pola Consellería de Cultura, Lingua e Xuventude. A iniciativa reúne máis de 3.600 actividades repartidas por arredor de 200 concellos de Galicia.
