A novela La península de las casas vacías, publicada por Editorial Siruela e asinada por David Uclés, e A noite das cebolas, editada por Xerais e escrita por Rosa Aneiros, foron escollidas como gañadoras ex aequo do Premio de Novela Europea do Casino de Santiago.
O fallo supón un fito na traxectoria deste certame literario, xa que é a primeira vez que unha obra en galego acada a máxima distinción do premio promovido pola Asociación Cultural Casino de Santiago. A novela de Aneiros comparte así o recoñecemento coa obra de Uclés nunha edición na que o xurado decidiu conceder o galardón de maneira compartida.
Dende a Asociación Cultural destacaron a colaboración institucional que permite desenvolver o premio e expresaron o seu agradecemento á Secretaría Xeral da Lingua, dirixida por Valentín García, polo seu apoio ao proxecto. A entidade tamén puxo en valor o “esforzo” das persoas que participan no día a día na organización e continuidade do galardón.
O Casino de Santiago trasladou igualmente o seu recoñecemento a todas e todos os lectores que fan posible esta iniciativa cultural, coa que a asociación busca contribuír á difusión da narrativa europea e ao encontro arredor da literatura desde Compostela.
