As festas da Ascensión 2026 arrincarán o vindeiro martes 12 de maio en Santiago cunha proposta singular ideada por Tanxugueiras, que converterán a Praza do Obradoiro nun espazo de escoita colectiva, creación visual e experiencia inmersiva para presentar por primeira vez ao público o universo sonoro do seu novo disco, O Cuarto.
A cita, prevista para as 20:00, non responderá ao formato habitual dun concerto, senón que se formula como unha acción experiencial e efémera deseñada especificamente para este escenario. O corazón monumental de Compostela será así o lugar elixido para unha conta atrás pública cara á publicación do novo traballo discográfico do grupo, nun evento que mesturará música contemporánea, identidade galega e intervención artística.
A proposta busca transformar o centro histórico de Santiago nun punto de encontro arredor da música galega a través dunha experiencia colectiva pensada para a escoita e a conexión co novo proxecto artístico de Tanxugueiras. Fronte á Catedral instalarase unha creación visual exclusiva para esta presentación, concibida unicamente para esta data e este espazo.
A instalación terá carácter irrepetible, xa que non se integrará na futura xira nin noutras presentacións posteriores de O Cuarto, o que converte a convocatoria nunha ocasión única vinculada especificamente ao inicio das celebracións compostelás.
