O Ateneo de Santiago clausurou este martes na sede de Afundación da Rúa do Vilar, 19, a quinta edición da Mostra Internacional de Cine e Educación (CINEDUCA) coa entrega do V Premio Ateneo CINEDUCA, nun acto que reuniu comunidade educativa, participantes e público arredor do audiovisual como ferramenta de aprendizaxe e expresión cultural.
A sesión final incluíu a proxección das tres curtametraxes seleccionadas como finalistas entre os traballos presentados por centros educativos galegos: Caer na conta, do CEIP Plurilingüe de Tenorio (Cerdedo-Cotobade); A palabra que se perdeu, do Colexio Franciscanos de Lugo, e Zona de Respecto: En obras, do CEIP Plurilingüe Mestre Rodríguez Xixirei de Santiago de Compostela.
O premio desta edición recaeu en A palabra que se perdeu, unha proposta elaborada por alumnado de 6º de primaria baixo a coordinación de Ginés Vázquez Seijas, que aborda cuestións como a memoria, a identidade e a importancia da palabra a través dunha narración vinculada á desaparición das linguas e á recuperación do universo literario de Álvaro Cunqueiro. O xurado distinguiu así unha obra centrada na conexión entre creación audiovisual, reflexión cultural e valorización do patrimonio literario.
UN ESCAPARATE PARA O AUDIOVISUAL ESCOLAR
As outras dúas pezas finalistas ofreceron tamén enfoques diversos sobre cuestións educativas e sociais, desde os cambios asociados ao paso á adolescencia ata a convivencia e resignificación dos espazos escolares, mostrando a diversidade temática e expresiva do cinema realizado no ámbito educativo galego.
A clausura rematou coa actuación do Coro Asubío, que puxo o peche musical a unha edición coa que o Ateneo reafirma a continuidade deste proxecto dedicado a fomentar o diálogo entre educación, cinema e cultura, consolidando ademais un espazo de visibilización para o talento creativo do alumnado galego.
