Santiago de Compostela xa quenta motores para unha nova edición das súas festas máis emblemáticas. A concelleira de Festas, Pilar Lueiro, presentou este martes no Pazo de Raxoi o programa completo das Festas da Ascensión 2026, que se desenvolverán oficialmente entre o 12 e o 17 de maio cunha oferta que combina grandes concertos, tradición popular, actividades culturais, propostas deportivas e eventos pensados para públicos de todas as idades.
A programación festiva ampliarase máis alá das datas centrais coa instalación das tradicionais atraccións na Alameda desde este venres 8 de maio e ata o luns 25. Ademais, manteranse os horarios inclusivos sen ruído os días 8, 16 e 17 entre as 17:00 e as 19:00, unha medida orientada a favorecer un acceso máis diverso ao recinto feiral. Tamén volverá funcionar o Punto Lila na Alameda entre o 13 e o 16 de maio, en horario de 20:00 a 01:00.
Durante a presentación, Lueiro definiu a Ascensión como “as festas máis picheleiras” e subliñou o seu carácter tradicional e aberto a toda a veciñanza. A responsable municipal tamén deu a coñecer o cartel desta edición, obra da artista compostelá Sara Romero, graduada en Belas Artes. A proposta visual céntrase na idea de movemento colectivo cara á festa e incorpora elementos recoñecibles como os cabezudos, o pichel, o polbo á feira, a música tradicional ou a nora da Alameda como símbolos da identidade festiva compostelá.
TANXUGUEIRAS ABRIRÁ AS FESTAS NO OBRADOIRO
O inicio oficial chegará o martes 12 coa actuación de Tanxugueiras na praza do Obradoiro, nun espectáculo de conta atrás para a presentación do seu novo disco e que servirá como gran apertura musical da semana.
O mércores 13 combinará teatro e música pop cunha representación de Espiñas Rosas no Teatro Principal e o concerto Santiago 40 Pop na Quintana, presentado por Tony Aguilar e con artistas como Chiara Oliver, Ruslana ou Marlon. A xornada rematará coa Orquestra América de Vigo na Alameda.
O xoves 14, xornada central da Ascensión, manterá algúns dos sinais de identidade máis recoñecibles da celebración, desde as alboradas matinais ata a comparsa de cabezudos, pasando pola tradicional Feira Cabalar da Ascensión no mercado de Amio.
A música tradicional ocupará durante toda a tarde rúas e prazas do casco histórico co programa Folk na rúa, mentres que o apartado escénico incluirá a representación de Esencia, con Juan Echanove e Joaquín Climent. Pola noite, o protagonismo musical trasladarase á Quintana con Mondra, nun concerto que o Concello prevé como un dos momentos destacados desta edición.
COMPOSFEST, FESTA DOS MAIORES E ROMARÍA DAS FLORES
O venres 15 volverá o Composfest á Quintana, acompañado do XLIX Torneo da Chave, actuacións corais e programación musical na Alameda.
Xa o sábado 16, a programación diversificarase coa Festa das persoas maiores, o Campionato Galego de Espada, a exposición FastLife ExpoMotor, escolas de baile tradicional, cantos de taberna e a Romaría das Flores en Belvís. A noite estará marcada polo concerto de Alba Reche dentro do ciclo SON Estrella Galicia.
ASCENSIÓN, LETRAS GALEGAS E BEGOÑA CAAMAÑO NO PECHE
O domingo 17 unirá tres dimensións simbólicas: o remate da Ascensión, a celebración das Letras Galegas e unha homenaxe específica a Begoña Caamaño. A xornada incluirá a XXV Carreira da Ascensión, o concerto A voz das Letras Galegas da Banda Municipal e un pasarrúas de Latexo Percusión.
O peche institucional e cultural chegará ás 20:00 na Quintana co espectáculo Circes e Morganas. Celebrando a Begoña Caamaño, presentado pola alcaldesa Goretti Sanmartín. Segundo destacou Pilar Lueiro, será “un día de moitas emocións” no que Compostela aspira a converterse nun epicentro festivo e cultural de Galicia.
