O conselleiro de Cultura, Lingua e Xuventude, José López Campos, xunto coa directora xerente da Cidade da Cultura, Ana Isabel Vázquez, e o director adxunto e conservador xefe da Frick Collection de Nova York, Xavier F. Salomon, celebraron un encontro na Cidade da Cultura para explorar posibles colaboracións en futuros proxectos.
No marco desta reunión, que coincidiu coa visita do representante da Frick á exposición ‘Tesouros reais’, a Consellería trasladou a súa intención de traballar conxuntamente en iniciativas que fortalezan os vínculos culturais entre ambas institucións. A Frick Collection, recoñecida mundialmente, alberga unha importante colección de arte que inclúe pinturas, esculturas e artes decorativas europeas do Renacemento ao século XIX, con obras de artistas como Rembrandt, Goya e Vermeer.
Durante a súa estadía, Salomon tamén visitou ‘Tesouros reais. Obras mestras do Terra Sancta Museum’, aloxada no Museo Centro Gaiás. Esta mostra inclúe valiosas doazóns das monarquías católicas europeas á Basílica do Santo Sepulcro e outros lugares sagrados cristiáns, sendo a primeira e única ocasión que estas pezas, orixinarias de Xerusalén, se exhiben en España como parte dun circuito internacional exclusivo.
