A candidata a reitora da Universidade de Santiago de Compostela Maite Flores anunciou este mércores o peche da súa campaña electoral cun acto festivo que se celebrará o vindeiro martes, día 10, na Sala Capitol, en Santiago de Compostela.
O anuncio realizouno a través dunha publicación na súa conta persoal na rede social Instagram, na que difundiu o cartel do evento e animou á comunidade universitaria a participar nesta cita final da campaña.
Segundo explicou na mensaxe, a festa dará comezo ás 21:30, coincidindo co tramo final do proceso electoral. “Xa sabedes que nesta candidatura somos moi de anticipar, planificar e liderar. Por iso, como xa superamos o ecuador da campaña, estamos a organizar a festa de peche na Sala Capitol o martes día 10, a partir das 21.30 horas”, indicou a candidata.
Flores detallou tamén que a entrada será gratuíta ata completar aforamento e que as persoas asistentes contarán cunha consumición gratis. A sesión musical correrá a cargo do DJ Carlos López, segundo se recolle na información difundida pola propia candidatura.
Este acto festivo servirá como clausura da campaña de Maite Flores nas eleccións á reitoría da USC, nas que distintas candidaturas están a presentar as súas propostas á comunidade universitaria nos días previos á votación.
