A Xunta de Confrarías de Santiago presentou o cartel da Semana Santa 2026, que terá lugar do 29 de marzo ao 5 de abril, e que contará con 17 procesións.
Segundo indicou a presidenta da Xunta de Confrarías, Elena Bermúdez, “en principio todo vai ser igual que en 2025”, salvo “algunha cousa de última hora que obrigue a modificar algo”. Así, vai haber 17 procesións cos mesmos percorridos e horarios.
Neste contexto, o arcebispo de Santiago, monseñor Francisco José Prieto Fernández, subliñou que a Semana Santa é un momento de “encontro e de celebración”, pero tamén de encontro nas rúas de “aqueles que acompañan, expresan e manifestan a súa fe a través dos distintos pasos das confrarías”.
Por iso, convidou a todos aqueles que se achegan a Santiago durante esas datas como peregrinos ou turistas, a “participar e visibilizar unha fe que se expresa precisamente con humildade, claridade e unha identidade indiscutible”.
Ademais, Prieto agradeceu o “traballo colaborativo” da corporación municipal, as autoridades autonómicas e os corpos e forzas de seguridade do Estado durante esas datas. “Unha Semana Santa non son soamente seis día intensos senón todo un ano que ten vida”, concluíu.
O CARTEL
Neste sentido, o irmán maior da Confraría da Humildade, Rubén Marcuño, explicou a composición do cartel que ten como obxectivo “facer un chamamento á peregrinación”, xa que este ano precede a un ano santo.
“No fondo temos a pedra de Santiago sobre a que pisamos durante a Semana Santa; despois temos a cuncha, que tamén está nesa pedra; o marco principal da nosa Señora da Humildade, que é de cor de bronce, igual que a cuncha; e acompañada dese incenso, co que se transcorre polo centro histórico durante esas datas”, detallou.
A continuación, sinalou que querían que se visen nela os detalles da cidade, como son a pedra que se pisa ao camiñar pola capital galega, a cuncha que indica as entradas do camiño e o incenso que acompaña cada mércores santo.
