Santiago de Compostela acollerá o mércores 31 de decembro, ás 17:30, a proxección do tradicional Concerto de Noitevella da Filarmónica de Berlín, unha cita que poderá seguirse en directo desde a capital alemá a través da gran pantalla. Na cidade, a sesión terá lugar en Cinemas Compostela, sumándose así á retransmisión simultánea noutras localidades galegas.
A proposta permite ao público compostelán despedir o ano cun dos concertos máis recoñecidos do calendario musical internacional, nun formato pensado para o ámbito cinematográfico. Segundo indica a organización, o programa ofrece unha selección “festiva, vibrante e chea de contrastes”, cun deseño “pensado para emocionar tanto aos oíntes expertos como a quen se achegan por primeira vez” ao repertorio sinfónico.
O concerto estará dirixido polo titular da formación berlinesa, Kirill Petrenko, e contará cunha duración aproximada de 120 minutos. A batuta do director ruso marcará un percorrido musical que combina “romanticismo, lirismo e modernidade”, segundo avanzan os organizadores.
O programa inclúe obras de compositores como Chaikovski, Gounod, Bizet, Massenet, Chabrier e culminará cunha peza de Gershwin, configurando unha proposta diversa que transita por distintos estilos e épocas da música clásica europea e americana.
A cita contará tamén coa participación do tenor francés Benjamin Bernheim, unha das voces máis recoñecidas do panorama lírico actual, descrito pola organización pola súa “elegancia vocal, expresividade e presenza escénica”. A súa intervención engade un compoñente vocal a un concerto concibido como celebración musical de fin de ano.
