Martin Garrix, Maroon 5, Rita Ora, Danny Ocean e Miriam Rodríguez actuarán o próximo 11 de xullo en Santiago con motivo da cuarta edición do Gozo Fest. A iniciativa enmárcase entre os denominados Concertos do Xacobeo. As entradas sairán á venda o próximo 19 de decembro ás 10.00 a través de Ticketmaster, El Corte Inglés e Ataquilla. Dous días antes, o 17, abrirase unha preventa limitada mediante a plataforma Live Nation con tickets desde 45 euros sen gastos de xestión incluídos.
O presidente de Galicia, Alfonso Rueda, presentou e promocionou o festival a través das redes sociais. Nun vídeo que mestura imaxes dos artistas anunciados co propio presidente falando. “Logo non digades que non vos avisei con tempo”, advertiu Roda aos fans. O proxecto, que conta coa colaboración da Xunta, aglutinou a máis de 170.000 persoas nas tres edicións anteriores. Robbie Williams, Ed Sheeran, David Ghetta ou Maná son algúns dos artistas que participaron en anos precedentes.
O impacto mediático do festival, segundo a Xunta, é “enorme”. Pois o traballo realizado permitiulles, ao seu entender, “proxectar a marca Galicia a nivel nacional e internacional”. O propósito que se marcan de cara ao 2026 é o establecerse como “punto de encontro” de cantantes e artistas internacionais de renome. Conformar unha “programación plural” que abarque distintos públicos obxectivo e estilos musicais é, á súa vez, outro dos obxectivos que difunde a Xunta na súa nota.
MESTURA DE ESTILOS
Maroon 5, gañadores dun Grammy, e Rita Ora, a través de singles como Anywhere, porán a vertente de pop ao festival. A banda estadounidense é, segundo o comunicado, unha das “máis exitosas do s.XXI”. Danny Ocean, cantante da produtora Atlantic Records, é o reggetonero seleccionado para a ocasión. O venezolano chegou á fama a través de Me Rehúso, unha canción con máis de dous billóns de reproducións en Spotify.
Martin Garrix, pola súa banda, é dj. “Un dos máis exitosos da escena pop e electrónica“, en palabras da Xunta. Non será a primeira vez que o neerlandés actúe no Monte do Gozo, pois xa o fixo en 2023 con motivo do festival O Son do Camiño. Miriam Rodríguez pecha un cartel “de luxo”, segundo o comunicado. A de Pontedeume iniciou a súa carreira musical tras pasar por Operación Triunfo e, actualmente, é “unha das voces máis destacadas” do panorama artístico nacional.
