A alcaldesa de Santiago de Compostela, Goretti Sanmartín, participou este venres na inauguración da exposición ‘As Moscoso, mulleres con poder na Compostela Baixomedieval’, unha mostra que busca poñer o foco sobre referentes femininos da historia medieval compostelá tradicionalmente ausentes dos relatos históricos.
Durante o acto, celebrado na Casa do Cabido, na Praza das Praterías, a rexedora estivo acompañada polo presidente do Consorcio de Santiago, José Antonio Domínguez, polo comisario da exposición, Miguel García-Fernández, e por membros da corporación municipal. Sanmartín subliñou a necesidade de visibilizar estas figuras femininas e afirmou que “eses referentes femininos deben estar e deben ser claros”.
A exposición reúne ilustracións orixinais de Héitor Picallo Fontes, material gráfico, libros e paneis explicativos que percorren a traxectoria vital e o contexto histórico das mulleres da liñaxe dos Moscoso, destacando o seu papel político, social e simbólico na Compostela baixomedieval. O percorrido tamén aborda a falta de presenza destas figuras na historiografía tradicional, a pesar da súa relevancia no seu tempo.
Na súa intervención, a alcaldesa puxo o acento na importancia de recuperar non só a memoria das mulleres anónimas, senón tamén a daquelas que exerceron poder en contextos históricos dominados por homes. “É moi importante poder darlle voz a esas mulleres silenciadas, a esas mulleres que xa non é a recuperación das mulleres anónimas, das clases populares, senón de mulleres con poder que tiveron un papel importante na sociedade compostelá naquela época, e das que practicamente non se sabe nada”, sinalou.
Sanmartín tamén vinculou esta reflexión co presente e lamentou que a invisibilización das mulleres siga a producirse na actualidade, facendo referencia a casos de liñaxes históricas nos que a presenza feminina continúa a quedar en segundo plano. Nese sentido, destacou o valor simbólico da inauguración da mostra coincidindo no tempo coa recente recepción das esculturas do Mestre Mateo, ao considerar que ambas iniciativas contribúen a ampliar a mirada sobre o patrimonio e a memoria colectiva da cidade.
A alcaldesa animou á cidadanía a visitar a exposición, que definiu como un espazo axeitado para poñer en valor unha liñaxe que considera necesario lembrar. “É un lugar moi bo para dar relevancia a unha liñaxe que non se debe esquecer”, indicou, engadindo que iniciativas deste tipo contribúen a avanzar no recoñecemento social do papel das mulleres a medio e longo prazo.
A mostra ‘As Moscoso, mulleres con poder na Compostela Baixomedieval’ poderá visitarse na Casa do Cabido ata finais do mes de febreiro, con acceso aberto ao público.
