O Centro de Educación Especial Manuel López Navalón, en Santiago, acolleu este venres a presentación das figuras cerámicas que distinguirán ás persoas e entidades premiadas no Festival Rebulir da Cultura Galega 2025. O alumnado do centro é o encargado, desde hai anos, de crear estes galardóns, unha colaboración que se consolidou como tradición anual.
O acto contou coa presenza do conselleiro de Educación, Ciencia, Universidades e FP, Román Rodríguez, acompañado pola directora xeral de Ordenación e Innovación Educativa, Judith Fernández. Rodríguez trasladou os seus parabéns ao profesorado e ao estudantado polo “esforzo e dedicación” que cada edición aprecen nas pezas, e salientou “a profundidade humana” dun proxecto que, ao seu xuízo, simboliza o valor da creatividade e do traballo colectivo dentro da educación especial.
A directora do centro, Silvia Marín Pereiro, enmarcou esta iniciativa na conmemoración do 3 de decembro, Día Internacional da Diversidade Funcional, lembrando que actividades como esta contribúen a promover unha sociedade “máis accesible e inclusiva”.
Os galardóns irán parar este ano ao grupo Malvela, á actriz Cristina Castaño, ao programa de televisión Luar e, como recoñecemento especial, á emigración galega en Euskadi. A entrega terá lugar o sábado 20 de decembro ás 19:00 no Complexo Rogelio García Yáñez do Picouto (Ramirás), no marco da programación do Festival Internacional Rebulir.
