A Asociación Área Empresarial do Tambre (AAET) acollerá este luns 24 de novembro a inauguración de ‘Inspirar/Expirar’, a nova exposición do creador compostelán Jorge Mirás. O acto terá lugar ás 20:00 no Centro Empresarial do Tambre e marcará o inicio dunha mostra que permanecerá aberta ao público ata o 18 de decembro, nun espazo cada vez máis presente na axenda cultural da contorna de Santiago.

O artista, nado na rúa de Abaixo e formado na Escola de Artes e Oficios Mestre Mateo, presenta 24 pezas cun enfoque abertamente minimalista, construídas a partir de formas orgánicas, xogos de luz e elementos verticais que combinan pintura e escultura. Mirás integra bloques de arxila adheridos ao lenzo, nun diálogo onde volume e superficie se contaminan mutuamente e obrigan ao espectador a un achegamento pausado. Tal e como explica, a exposición busca provocar unha reacción íntima: “O obxecto desta exhibición é causar unha acción-consecuencia, é dicir, que o público experimente un proceso de busca do inevitable”.

As obras formulan unha gramática híbrida, na que a pintura se expande en volumes e a escultura se desdobra cara ao plano. Deste xeito, xorden columnas que asemellan respirar, estruturas que lembran caixas torácicas en movemento, ou formas alongadas que funcionan como puntos de fuga para a cor, sempre situada en ocos e cavidades que dependen da iluminación natural. “A cor fica nas cavidades e xoga coa luz natural neses ocos propiciados polas sombras”, sinala o artista, quen reivindica influencias de referentes do minimalismo internacional como Donald Judd ou Dan Flavin.

Mirás, cunha longa traxectoria nas artes gráficas e máis de trinta anos de experiencia profesional en medios de comunicación, continúa explorando nesta mostra unha liña creativa que combina investigación formal e experimentación material. ‘Inspirar/Expirar’ é a súa segunda exposición en Santiago e chega nun momento no que o creador está implicado en diversos proxectos de interiorismo e arte plástica.

A mostra poderá visitarse de luns a venres, en horario de 09:00 a 14:00 e de 16:00 a 19:00, sendo recomendábel avisar con antelación no 981 55 28 50. A AAET destaca que este tipo de iniciativas contribúen a reforzar o vínculo entre o tecido empresarial do Tambre e a vida cultural compostelá, abrindo novos espazos para a creación contemporánea.