A Universidade de Santiago de Compostela mantén a súa aposta pola creación musical dentro da comunidade universitaria coa convocatoria, por terceiro ano consecutivo, do Certame de grupos musicais da USC, promovido pola Vicerreitoría de Estudantes e Cultura. O obxectivo da iniciativa é dar visibilidade a artistas e bandas de música moderna formadas por membros da universidade, especialmente do estudantado.
As persoas interesadas poderán presentar candidaturas individuais ou en grupo ata o 7 de xaneiro de 2026. No caso das formacións, deberán estar compostas por polo menos dous integrantes da comunidade universitaria, ou tres cando o grupo teña cinco ou máis membros. O certame contempla tres premios económicos de 800, 450 e 250 euros, que se outorgarán ás mellores propostas segundo a valoración do xurado.
As bases establecen que cada participante só poderá presentar unha proposta musical orixinal e non premiada anteriormente, e non poderán concorrer quen resultase gañador noutras edicións nin quen teña traballos discográficos editados, salvo se foron autoeditados e sen apoio discográfico na actualidade.
O proceso de selección desenvolverase en dúas fases. Na primeira, o xurado realizará unha preselección de tres finalistas atendendo a criterios de orixinalidade e instrumentación (3,5 puntos), afinación e execución (3,5), posta en escena (2) e uso do galego (1). Na segunda fase, as propostas finalistas actuarán en directo nun concerto da Primavera Cultural 2025, cunha intervención de ata dez minutos, da que sairán os tres proxectos premiados.
Nas edicións anteriores, o certame recoñeceu a traxectoria de bandas e artistas emerxentes da USC. En 2023 o primeiro premio foi para ‘The Displacements’, seguidos de ‘Aprendiz’ e Diego Flâneur, mentres que en 2024 o grupo Ginko Biloba se fixo co galardón principal, acompañado novamente por Aprendiz e Why not? nos seguintes postos.
