O edificio da Praza de Abastos converteuse esta mañá no epicentro da celebración dos 80 anos da súa inauguración, cun acto central no que participaron a alcaldesa de Santiago, Goretti Sanmartín, o concelleiro de Mercados, Xan Duro, membros da Corporación municipal, a xerenta da Praza, Marta Rey, e Joaquín Vaquero Ibáñez, neto do arquitecto que deseñou o edificio, Joaquín Vaquero Palacios. Como fixera no acto de 1944, a Banda Municipal de Música puxo o acompañamento sonoro da conmemoración.
Durante o evento, o Concello recoñeceu a traxectoria das persoas praceiras máis veteranas: María del Carmen Aldrey Piñeiro, de Peixes Maricarmen; Antonio José González Álvarez, da Chacinería Seco; e María del Carmen Rarís García, da terceira xeración de pementeiros da súa familia. “As persoas que levan sostendo o mercado ao longo de tantos anos son as verdadeiras protagonistas deste acto”, sinalou Xan Duro, quen defendeu “o papel da Praza como centro de alimentación de proximidade e eixo do Pacto Alimentario de Milán, comprometido coa creación de sistemas agroalimentarios sostibles, inclusivos e diversificados”.
Pola súa banda, Goretti Sanmartín describiu a Praza como “un monumento dentro dun monumento, un mundo dentro dun mundo, unha cidade con vida propia no corazón da nosa cidade”. A rexedora destacou o seu valor como espazo de memoria colectiva, económico e social, e como símbolo do comercio local e da sustentabilidade. “A Praza é, indubidabelmente, a súa xente, as persoas que cada día abren os seus postos e manteñen vivo este corazón da cidade”, engadiu.
A alcaldesa tivo tamén palabras de lembranza para Antonio Costa, da carnicería Chelo & Muñico, vítima dunha agresión hai case un ano, e para Lolo Fernández, da Cortadoría Fina, así como para outras persoas da Praza xa falecidas.
A xornada incluíu tamén a inauguración dunha exposición fotográfica na praza de Mazarelos, comisariada por Ruth Varela, que repasa en imaxes a historia do mercado entre 1935 e 1975. A mostra reúne fondos de institucións como a Filmoteca de Galicia, o Consorcio de Santiago e o Fondo Sánchez Estalote, e poderá visitarse ata o 27 de outubro, antes de trasladarse á Praza Roxa.
Dentro da campaña ‘80 anos alimentando Compostela’, o Concello desenvolverá diferentes accións de promoción e educación alimentaria. O departamento de Mocidade levará os cursos de cociña do Centro Xove á Praza de Abastos, co obxectivo de achegar o mercado á mocidade e fomentar hábitos de consumo responsable e sostible. As sesións terán lugar o 17 de novembro e os días 8, 15, 22 e 29 de decembro, en horario de 18:00 a 21:00, con inscrición previa en info@centroxove.com.
Tamén se distribuirán bolsas de malla e friameiras reutilizables entre a clientela, a cambio de tíckets de compra de 15 e 25 euros, e presentaranse nas próximas semanas vídeos divulgativos e a imaxe da campaña, creada pola artista Lidia Cao, quen se inspirou nunha fotografía das irmás Maruxa e Coralia na Praza para unir tradición e modernidade.
Finalmente, o departamento de Mercados prepara para xaneiro unha xornada técnica coa participación de entidades como a FAO, Justicia Alimentaria, o Observatorio do Dereito á Alimentación, as universidades galegas e a Rede de municipios pola agroecoloxía, co obxectivo de fortalecer a rede local de apoio á Praza de Abastos e aos sistemas alimentarios de proximidade.
