A Universidade de Santiago de Compostela acollerá o martes 15 de outubro ás 19:00 no Paraninfo da Facultade de Xeografía e Historia un acto de lembranza dedicado a Emilio Cao, un dos nomes fundamentais da música galega contemporánea e pioneiro na introdución da arpa celta no folk galego. A iniciativa, organizada pola Facultade de Xeografía e Historia en colaboración coa Central Folque, conta con entrada libre e pretende recoñecer a traxectoria dun artista que marcou unha época e deixou unha profunda pegada cultural.
Natural de Santiago de Compostela e antigo alumno da USC, Emilio Cao colaborou en múltiples ocasións coa Universidade, participando en proxectos como Galego no mundo. Latim em pó e en diversos seminarios de música galega impulsados pola profesora Pilar Alén.
O acto estará estruturado en tres partes. A primeira incluirá unha mesa institucional e familiar, coa presenza de Antonio Míguez, decano da Facultade; Federico López, do Departamento de Historia da Arte; e Mateo Cao, familiar do músico e realizador dunha peza audiovisual documental sobre a súa figura.
Na segunda parte intervirán persoas próximas a Emilio Cao e ao seu legado artístico: o docente Elías Torres, amigo persoal do músico; o tamén intérprete e compositor Bieito Romero; a escritora e dinamizadora cultural Branca Novoneyra; e o musicólogo Xavier Groba, quen analizará a contribución de Cao á renovación do folk galego.
O acto pecharase cun recital de arpa a cargo de Nuria de León, Bleuenn Le Friec e Manuel Vilas, tres intérpretes que darán forma musical ao espírito dunha homenaxe que une recordo, creación e comunidade arredor dunha das voces máis singulares da música galega moderna.
