O Concello de Santiago de Compostela e Nova Escola Galega entregaron os galardóns da XVI edición dos Premios Educacompostela, uns recoñecementos destinados a promover a innovación pedagóxica e a calidade educativa en Galicia. O primeiro premio foi para o proxecto O patrimonio de Sabugueira, elaborado polo CEIP Mestre Rodríguez Xixirei, da capital galega.
O xurado subliñou o carácter interdisciplinar e interxeracional desta iniciativa, que parte da biblioteca escolar e involucra toda a comunidade educativa e a veciñanza, centrando o seu labor na investigación e posta en valor do patrimonio material e inmaterial da parroquia de Sabugueira.
O segundo premio recaeu en O voo 2316: química forense na aula, de María González Iglesias, profesora do IES Politécnico de Vigo (Pontevedra). O tribunal valorou o uso de metodoloxías activas baseadas na investigación e na aprendizaxe a través do xogo, trasladando contidos teóricos das ciencias experimentais a procesos prácticos e participativos, con atención á diversidade mediante o deseño universal da aprendizaxe (DUA).
O terceiro galardón foi para A viaxe, cando escapar non é un xogo, presentado pola Asemblea de Cooperación pola Paz (Santiago de Compostela). Neste caso, destacouse a calidade e variedade dos materiais, o coidado do deseño e a súa adaptabilidade a distintas etapas educativas, ademais do feito de ser unha proposta elaborada por unha entidade externa ao ámbito escolar, pensada para contextos educativos diversos.
Finalmente, o xurado outorgou unha mención especial ao proxecto Mentes inquietas, desenvolvido por María Isabel González Piñeiro, do IES Plurilingüe Rafael Dieste (A Coruña), pola notable implicación do centro educativo na iniciativa.
Os Premios Educacompostela teñen como obxectivo recoñecer e difundir materiais didácticos de interese educativo, abertos a todas as etapas e contextos do ensino galego, desde infantil ata educación postobrigatoria, incluíndo tamén accións de carácter socioeducativo.
