O Ateneo de Santiago deu a coñecer este luns a súa programación para o curso 2025-2026, que contará con máis de 200 actividades distribuídas entre conferencias, concertos, cinema e visitas culturais. O presidente da entidade, Francisco Candela, subliñou que se trata dun “traballo colectivo”, resultado da implicación da xunta directiva e dos socios, e que combina propostas veteranas con novas iniciativas adaptadas ás demandas culturais e sociais da cidade.
Entre os proxectos máis consolidados destacan os Luns do Ateneo, presentados por Manuel López-Rivadulla, que arrancarán o 6 de outubro cunha conferencia da presidenta do Consello de Estado, Carmen Calvo, baixo o título Estructuras e fortalezas da democracia. O ciclo contará tamén coa participación do historiador Julián Casanova, o exalcalde Xerardo Estévez e o presidente da Real Academia Galega, Henrique Monteagudo.
Tamén se anunciou a sétima edición do Festival Ateneo Barroco, presentado por Carmen Sánchez, que se celebrará entre o 8 e o 22 de outubro. O programa estará dedicado aos instrumentos característicos da época e incluirá actuacións de agrupacións como Camerata Boccherini ou a Capela Compostelana, ademais de conferencias, cine, clubs de lectura e sesións de improvisación abertas ao público.
Outra das novidades é o Festival de Cine e Educación CINEDUCA, coordinado polo profesor Miguel Zabalza, que nesta edición terá como tema central a familia como espazo educativo. O festival contará cun concurso escolar de creación audiovisual a nivel galego e coa proxección de seis películas relacionadas coa temática. Ademais, o vicepresidente do Ateneo, José Manuel González Herrán, anunciou a creación de dous novos ciclos de Cineclub: un dedicado ao cinema galego e outro de carácter internacional.
A programación complétase coa sección Ateneo Viaxeiro, presentada por Marisa Somoza, que organiza visitas guiadas e saídas culturais por diferentes puntos de Galicia para achegar á cidadanía o seu patrimonio paisaxístico, histórico, artístico e cultural.
